Rutinas de entrada

Todas as mañás realizamos unha serie de "rutinas de entrada" que nos ofrecen estabilidade e unha referencia, ademais de moitas outras aprendizaxes. A primeira delas xa a vimos aquí.
Pois ben, unha vez sentados todas e todos no corcho comezamos cantando e dando os bos días, continuamos co calendario e o tempo atmosférico e rematamos co debuxo do esquema corporal.
Quen fai todas estas tarefas? Iso indícanolo un gusano no que están colocadas as nosas fotos para ir levando un rexistro e saber a quen lle toca cada día, así seguimos unha orde. A quen lle toque convírtese no encargado ou encargada do día! Toda unha responsabilidade que fan con moito estusiasmo...

Seguide lendo para ver como facemos estas rutinas e algunhas das cousas que aprendemos con elas.

O primeiro que facemos é dar os bos días aos compañeiros e compañeiras, pero non só iso! Tamén nos axuda a ir aprendendo como se escriben os seus nomes, imos interiorizando a dirección da lecto-escritura (seguimos a orde esquerda-dereita e de liña a liña), contamos os que estamos no cole e os da casa (traballamos o conteo e permítenos ir iniciándonos na suma e resta) e, ao igual que no resto de rutinas, favorecemos a atención e escoita.

A continuación, tachamos no calendario o día anterior e rodeamos o día no que estamos, así imos interiorizando os conceptos temporais: onte-hoxe-mañá, os días da semana e os meses. Isto trasladámolo a un panel máis grande no que temos que escoller o día da semana no que nos atopamos e contar...xa o facemos así de ben!

Pero o noso traballo no calendario non remata aquí. Debuxamos no día correspondente o tempo que fai, favorecendo así a observación do entorno que nos rodea e apreciando os cambios que se producen.

Cos datos que imos recollendo e debuxando realizamos unha estadística. Aquí tedes o resultado do mes de novembro...xa vos contaremos as conclusións as que chegamos vendo isto!

Seguidamente, colocamos o debuxo realizado pola encargada ou encargado do día. O esbozo do esquema corporal vai sendo cada vez máis completo, velo aquí reflexado axúdanos a ir engadindo cada vez máis detalles e, algo moi importante, valoramos as producións dos nosos amigos e amigas, sabemos que todas son diferentes e únicas, por iso nos gustan tanto!

Neste debuxo tamén escribimos o nome e imos tomando conciencia das súas letras e sons.

E xa para rematar, falamos un pouco daquelas cousas que nos preocupan, nos interesan ou que simplemente queremos compartir cos demais. En ocacións, a nosa mascota Lucas sérvenos para respectar o turno de palabra, quen ten a Lucas fala e os demais escoitamos con atención...somos todo orellas ;)

Estes días estámolo facendo co Apalpador...

...e colorín colorado as rutinas de entrada de hoxe están rematadas. Un segredo, as veces nestas rutinas atopamos cartas, ou obxectos máxicos, pero isto xa volo contaremos noutro capítulo...